ՀԱՅՐԱՔԱՂԱՔ | ՀԱՍԱՐԱԿՈՒԹՅՈՒՆ

Ապօրինի ինքնակամ շինարարություն նկատելիս՝ զանգեք քաղաքապետարան

Գյումրու քաղաքապետի նորանշանակ տեղակալ Հայկ Սուլթանյանն ասուլիս էր հրավիրել, որի նպատակն էր հանրությանը տեղեկացնել, թե ապօրինի շինությունների, անպարտաճանաչ սեփականատերերի, անբարեխիղճ կառուցապատողների հարցերով զբաղվող քաղաքապետարանի պատասխանատու բաժինն ինչ աշխատանքներ է իրականացրել, ինչքան իրավախախտումներ է արձանագրել և այլն:

Հայկ Սուլթանյանը, մասնավորապես, ասաց. «Համայնքի ղեկավարի որոշմամբ՝ ինձ վերապահվել է համակարգելու համայնքային անշարժ գույքի կառավարման, գովազդի, առևտրի և սպասարկման ոլորտի համակարգման, կրթության, ֆիզկուլտուրայի և սպորտի, իրավաբանական և տրանսպորտի բաժինների աշխատանքները, ինչպես նաև սոցիալական աջակցության Գյումրի-1 և Գյումրի-2, և Քաղաքացիական կացության ակտերի գրանցման տարածքային բաժանմունքների աշխատանքները: Աշխատանքային մեկ ու կես ամսվա ընթացքում ես տեսա, որ քաղաքացիները՝ ոչ բավարար իրազեկվածության հետևանքով, սկսում են շինարարություն՝ չգիտենալով օրենքի պահանջները, կատարում են իրավախախտումներ, որոնք առաջացնում են հետևանքներ: Դրա համար մեր քաղաքացիներին կուզենամ բացատրել, թե ինչ է ինքնակամ շինությունը… Շինարարությունը կամ շինությունն համարվում է ինքնակամ կամ ապօրինի, եթե այն կառուցվում է օրենքով և իրավական ակտերով սահմանված նպատակներին չհամապատասխանող հողատարածքներում, կամ կառուցվում է առանց թույլտվության, կամ կառուցվում է թույլտվությամբ, բայց սահմանված պայմանների, քաղաքաշինական նորմերի և կանոնների էական խախտմամբ»

Այնուհետև Հ.Սուլթանյանը ներկայացրեց, թե որն է կոչվում շինթույլտվություն, որ դեպքերում են քաղաքացիները ենթարկվում պատասխանատվության, և ինչպիսի վարչական տուգանքներ են նախատեսված. «Ի՞նչ տուգանքներ են նախատեսվում «Վարչական իրավախախտումների մասին» ՀՀ օրենքով. եթե շինարարությունն իրականացվել է սեփականության կամ հողօգտագործման իրավունք ունեցող անձի կողմից այդ հողամասի վրա առանց շինթույլտվության, կամ բազմաբնակարան շենքերի ներսում կամ շենքերին կից ինքնակամ կառուցելն առաջացնում է տուգանքի նշանակում՝ սահմանված նվազագույն աշխատավարձի (մեկ հազարի) 200-ապատիկի չափով: Եթե քաղաքացին հողօգտագործման իրավունք չունի, և ինքնակամ շինարարություն է իրականացրել պետությանը կամ համայնքների սեփականության իրավունքով պատկանող տարածքներում, ապա տուգանվում է սահմանված նվազագույն աշխատավարձի 400-ապատիկի չափով: Եթե քաղաքացին շարունակում է ինքնակամ շինաշխատանքները, տուգանվում է աշխատավարձի 2500-ապատիկի չափով»:

Պատասխանատուն նաև նշեց, որ քաղաքապետարանի աշխատակազմը պատրաստակամ է աջակցություն ցուցաբերել շինարարություն իրականացնող բոլոր անձանց, որպեսզի շինարարությունն իրականացվի օրենքով, իրավական ակտերով սահմանված կարգով: Ասաց՝ կան դեպքեր, որ քաղաքացին տեղյակ չի եղել, բայց եղել են դեպքեր, որ դիտավորյալ են կատարել իրավախախտումներ: Համայքնապետարանի համապատասխան բաժնի աշախատակիցները հայտնաբերելով իրավախախտմամբ իրականացվող ինքնակամ կամ ապօրինի շինությունները, արձանագրում են, և համապատասխան վարույթ սկսում:

Քաղաքապետարանի իրավաբանական բաժնի աշխատակից Աննա Մանուկյանը ներկայացրեց, թե քանի ապօրինի շինություններ են արձանագրվել. «Օրինակ, Գյումրու Հալաբյան փողոց, Թբիլիսյան խճուղի, Աբովյան, Մանուշյան  փողոցներում, Շահումյան 125/6, Ավետիսյան 19 շենք, Գարեգին Նժդեհ 20 շենք և այլ հասցեներում…  Գյումրու համայնքապետարանում 36 վարչական վարույթ է ընդունվել, որից 25-ի դեպքում տույժ-տուգանքի են ենթարկվել ինքնակամ, ապօրինի կառույցի սեփականատերերը: Երկու գործի վարույթ կարճվել է, մյուսները վարույթի փուլում են»:

Լրագրողներից մեկն ասաց, որ Գյումրիում կարծես ձևավորված պրակտիկա է. մարդը գիտակցաբար շինարարություն է իրականացնում, հետո քաղաքապետարանը «պատահաբար» հայտնաբերում է, տուգանում է, բայց ամեն ինչ մնում է իր տեղում… Հ.Սուլթանյանը բացատրեց, որ կան գործեր, որոնց հանդեպ բոլոր տուգանքներն իրականացնելուց հետո դիմել են դատարան: Օրինակ բերեց Աբովյան փողոցի 133/2 և 133/7 հասցեներում գործող «Անի» ռեստորանը (Քաղաքապետարանը հայցադիմով դիմել է դատարան, որպեսզի պարտավորեցնեն շահագործողին՝ դադարեցնել գործողությունները և վերացնել հետևանքները: Քանի որ դատական գործընթացներն երկար են տևում և, որպեսզի կարողանան քայլեր ձեռնարկել, միջնորդություն են ներկայացրել դատարան՝ արգելել սեփականատիրոջը: Դատարանը միջնորդությունը մերժել է):

Փոխքաղաքապետը ներկայացրեց, որ այդ ռեստորանի բարձր երաժշտությունը խանգարում է ճեմողներին, կից գործում է Տիկնիկային թատրոնն ու Երիտասարդական պալատը: Լրագրողներից մեկն էլ նկատեց. «Թող սկզբից ևեթ թույլտվություն չտայիք»: Ապա լրագրողները մեկ առ մեկ նշեցին այն բացթողումները, որոնք քաղաքապետարանի գիտությամբ են. Ռիժկովի ճեմափողոցի երկու կողմերում բացօթյա սրճարանների կողմից մայթերի «զավթումը», արդյո՞ք այն իրավախախտումներով չէ:

Մյուս օրինակը վերաբերում էր՝ Բորյան փողոցի 2/3 հասցեի բնակելի մասով («Դվին» հանդիսությունների սրահ) առտրի և սպասարկման երկհարկանի օբյեկտին: Տարածքը պատկանում է Գյումրու քաղաքապետարանի բնակկոմունալ բաժնի նախկին պետ Հովհաննես Գրքիկյանի ազգականներ` Անահիտ Գրքիկյանին ու Արմեն Մովսիսյանին: Վերջիններս դատի են տվել Գյումրու քաղաքապետարանին՝ Շիրակի մարզի ընդհանուր իրավասության դատարան ներկայացնելով նյութական վնասի փոխհատուցման պահանջով հայց, քանի որ քաղաքապետարանի առաջացրած խոչընդոտների հետևանքով իրենք 3 տարի 8 ամիս չշահագործելու պատճառով, իրենց հաշվարկներով, կրել են 54 մլն դրամի չափով վնաս:

Հայկ Սուլթանյանը նեղված ասաց. «Այստեղ ավելի շուտ բարոյական խնդիր կա. մենք բազմաթիվ կազմակերպությունների, կառույցների հետ ենք աշխատում, որպեսզի մեր քաղաքում տարբեր ծրագրեր իրականացնենք… Նույն չափի գումար մարաթոնի շնորհիվ հավաքվեց և մենք 2 մանկապարտեզ նորոգեցինք: Մեր բիզնեսմենների, գործարարների նման պահանջները շատ վատ արձագանք է ունենում սփյուռքում, և բարեգործական կազմակերպությունների մոտ, իսկ մեր գործարարները նման հայցով են դիմում դատարաններ: Խնդրում և հորդորում եմ մեր գործարարներին` միտումնավոր որևիցե փաստեր չօգտագործել համայնքի դեմ և նման հայցադիմումներով հանդես չգալ»:

Լրագրողների շատ հարցերին՝ ինչո՞ւ են քաղաքում, հատկապես կենտրոնական հատվածներում, թույլատրում բազմատեսք ու բազմաձև տաղավարների, առևտրի կրպակների տեղադրումը, ինչո՞ւ շատ տարածքներում ինքնակամ կառուցապատումներ են իրականացվում, իսկ համայնքը դեմը չի առնում և այլն, Հայկ Սուլթանյանը պատասխանեց, որ ինքը պատասխանատու է այն աշխատանքների համար, որոնք իր պաշտոնավարման ընթացքում են գրանցվել, բայց քաղաքապետարանն իր իրավասությունների սահմանում բոլոր քայլերն անում է: Նաև հորդորեց, խնդրեց` ինքնակամ, ապօրինի շինություններ նկատելիս` անպայման ահազանգել:

print
1,242