Գյումրու զարգացման խնդրով նոր կառավարությունը եւս մտահոգված է ⋆ «Շրջապատ»
ՀԱՅՐԱՔԱՂԱՔ | ՀԱՐՑԱԶՐՈՒՅՑ

Գյումրու զարգացման խնդրով նոր կառավարությունը եւս մտահոգված է

Հարցազրույց Գյումրու քաղաքապետ ՍԱՄՎԵԼ ԲԱԼԱՍԱՆՅԱՆԻ հետ:

Պարոն քաղաքապետ, մոտ 3 ամիս առաջ իսրայելական խոշոր ընկերությունը հանդիպեց Ձեզ հետ և բավական մեծ ծրագրերից խոսեց. ի՞նչ տեղեկություն կարող եք փոխանցել, նրանք, ի վերջո, գործունեություն ծավալելո՞ւ են Գյումրիում:

— Այս տարվա սկզբին Գյումրու քաղաքապետարանը և «ԼՈՋԻՍՏԻԿ ԷՖ ԹԻ ԶԻ» ՍՊԸ-ն կնքեցին փոխըմբռնման հուշագիր: Ընկերությունը հետաքրքրված է Գյումրիի տարածքում կառուցելու, շահագործելու և զարգացնելու օդային փոխադրումներ իրականացնող օդանավերով փոխադրվող ապրանքների համար նախատեսված լոգիստիկ ազատ տնտեսական գոտի (այսուհետ՝ «Լոգիստիկ ԱՏԳ»): Իսկ քաղաքապետարանն աջակցում է ընկերության նախաձեռնությանը և պատրաստակամ է վերջինիս հետ համագործակցելու և օժանդակելու Լոգիստիկ ԱՏԳ-ի զարգացման հարցում: Սա խոշոր ծրագիր է, որի իրականացումն իր հետ կբերի մեծ թվով աշխատատեղեր: Այս ծրագրով, ոնց ասում են, գնդակը կառավարության դաշտում է: Սպասում ենք, որ կառավարությունն այդ մասով ազատ տնտեսական գոտի տա:

Սրանից բացիկա՞ն արդյոք այլ ներդրումային ծրագրերի առաջարկներ:

— Նյու Յորքում բնակվող հայ բժիշկ, մեծ բարերար Հովհաննես Օյունջյանն իր կյանքի վերջին օրերին հերթական ներդրումը կատարեց Գյումրիում, համերգասրահի շենքի կառուցման հիմնաքարը դրվեց բժշկի ծննդյան օրը։

Կա «Բարեկամություն» այգու բարեկարգման ծրագիր: Կա ևս մեկ ծրագիր, որը կապված է շվեյցարահայ բարերար Վարդան Սըրմաքեշի հետ: Այն առնչվում է թե՛ աշխատատեղերի ստեղծման, և թե՛ բնակարանների հետ: Բուլվարային թաղամասում, նախկին ռադիոգործարանի պետական ստրուկտուրա համարվող շենքում նախատեսվում է ժամացույցների տարբեր դետալների արտադրություն սկսել, ինչը ևս կստեղծի աշխատատեղեր։ Նույն ծրագրով նախատեսվում է տվյալ շենքում ունենալ հանրակացարան կամ սոցիալական բնակարաններ:



Կառավարության հետ ենք ծրագիր անում՝ «Մուշ 2» թաղի հրապարակն ենք կառուցում. մոտ 3 հեկտար տարածք է, շինարարը պարզ է, աշխատանքները սկսում ենք: Ըստ ծրագրի՝ 70 տոկոսը վճարվելու է մեր բյուջեից, 30 տոկոսը՝ կառավարությունից: Կառավարության որոշումը կա, հստակ կա պայմանավորվածություն:

Եվս մեկ ծրագիր ենք իրականացնում կառավարության հետ. դա կապված է աղբատար մեքենաների հետ: 5 նոր մեքենա ենք ներկրելու, որից 4-ը աղբատար են, մեկը՝ ինքնաթափ: Մրցույթն արդեն հայտարարել ենք, հավանաբար մինչև օգոստոսի վերջ կունենանք նաև արդյունքը: Այս ծրագիրն իրականացնում ենք 47/53 տոկոս հարաբերակցությամբ: Մեր մեքենաները կարողանում են 7խմ աղբ տեղափոխել, իսկ նոր մեքենաները կկարողանան տեղափոխել 21խմ: Նոր աղբարկղեր ենք պատվիրել՝ 50 հատ, շուտով դրանք էլ կլինեն:

Խոշոր ներդրումային ծրագրերից՝ «Բարեկամություն» այգու կապիտալ վերականգնող շրջանառվում է Ռուբեն Վարդանյանի անունը, ասում են՝ այնտեղ «Դիսնեյ լենդ» է կառուցվելու

— Գյումրու կենտրոնական հատվածում՝ Շառլ Ազնավուրի հրապարակի մոտակայքում գտնվող «Բարեկամություն» այգու բարեկարգման ծրագրով՝ ներդրումներ կատարելու նպատակով այն հանձնվելու է ընկերություններից մեկին պատկանող կազմակերպությանը, այս պահին չեմ ուզում անուններ նշել: Հիմա ընթանում է տարածքի բնակիչներին բնակարաններով ապահովելու, այգին տնակներից ազատելու գործընթացը:

— «Մարիամ և Երանուհի Ասլամազյան քույրերի պատկերասրահի» վերանորոգման մասին ինչպիսի՞ շարունակականություն եք տեսնում:

— «Մարիամ և Երանուհի Ասլամազյան քույրերի պատկերասրահի» նախագծա-նախահաշվային փաստաթղթերն ամբողջությամբ պատրաստ էին, այն ուղարկվել է Համաշխարհային բանկ և սպասում ենք պատասխանի:

Ձեր գնահատմամբ, ինչո՞ւ է կանգ առել Շիրազի փողոցի և հարակից 4 փողոցների վերանորոգման աշխատանքները:

— Շիրազի փողոցի հիմնանորոգումը կիրականացվի Համաշխարհային բանկի ֆինանսավորմամբ: Արդեն իսկ հայտարարվել է մրցույթը, և հուսով ենք, մինչև օգոստոսի վերջ պարզ կլինեն շինարարները: Երկու շինարար է լինելու:

 — ՎԶԵԲ ծրագրով վերանորոգվող փողոցների շինաշխատանքներին վերահսկողական որևէ մարմին կա՞, որը պետք է հետևի շինաշխատանքների, ասֆալտի որակին:

— Այս մասով մեզ բոլորը պետք է օգնեն՝ թե՛ բնակչությունը, թե՛ ԶԼՄ-ները, թե՛ հասարակական սեկտորը: Աշխատանքների վերահսկողությունն իրականացնելու համար մենք արդեն տվել ենք հայտարարություն և հրավիրել ենք մասնագետներ:

Նոր կառավարության հետ եղե՞լ են քննարկումներ՝ Գյումրու զարգացման, անօթևանության խնդրի լուծման, և այլ հարցերի շուրջ:

— Այս հարցով տարածքային կառավարման նախարարության հետ հանդիպում-քննարկում եղել է, փնտրվելու են լուծումներ: Նոր կառավարությունը ևս խնդրով մտահոգված է և վարչապետը իր մամուլի ասուլիսի ժամանակ անդրադարձավ այս հարցին:

Նախկին վարչապետ Կարեն Կարապետյանը Գյումրու զարգացման ուղիներից մեկը մատնանշել էր զբոսաշրջության զարգացումը, որը նաև քաղաքի զարգացման տեսլականում է նշված: Այսօր  ի՞նչ խոշոր քայլեր են անհրաժեշտ, որպեսզի այն չմնա թղթի վրա կամ խոսակցության մակարդակում:

— Տուրիզմի զարգացումը շատ ենք կարևորում, ինչի համար շատ կարևոր է ունենալ բարեկարգ քաղաք: Բավական մեծ է ակտիվությունը Գյումրու «Շիրակ» օդանավակայանում, կան խոսակցություններ թռիչքների ծավալների ընդլայնման: Բարեկարգման աշխատանքներ են իրականացվում օդանավակայանի ներսում. մեծացնում ենք թե՛ ժամանման, թե՛ մեկնման սրահները։ Հյուսիս-հարավ ճանապարհի կառուցումը ևս կնպաստի տուրիզմի զարգացմանը, մասնավորապես, ներքին տուրիզմի զարգացմանը:

Խոսվում էր Գյուլբենկյանի անվան նախկին հիվանդանոցի շենքի՝ Երկրագիտական թանգարանին տրամադրելու մասին: Մշակույթի նախարարությունը դեմ չէր, սակայն Դուք դիմել էիք վերջինիս, առաջարկելով այլ շինություն:

— Դեռ տարիներ առաջ ես ասել ու առաջարկել եմ՝ բերեք մշակույթի և սպորտի նախարարությունները տեղափոխենք Գյումրի, և տվյալ շենքը տրամադրենք նախարարությունների համար: Ես նույնիսկ առաջարկել եմ, որ «Ճերմակ» հիվանդանոց տեղափոխվի Ֆիզկուլտ ինստիտուտը, ինչը իր հետ 6000 ուսանող կբերի Գյումրի:

Չնայած Տեքստիլագործների հայտնի հանրակացարանի շենքը սեփականատեր ունի, սակայն այսքան տարի ոչ մի ներդրում չի եղել, մինչդեռ շենքը քաղաքի կենտրոնական հատվածում է գտնվում, և փլուզման եզրին է: Ի վերջո, ինչ է սպասվում այս շենքին:

— Շենքի վերջին փլուզումից հետո մենք այնտեղ մնացած բնակիչներին տեղավորեցինք նոր հասցեներում, հիմա այնտեղ 2 բնակիչ է մնացել: Այդ բնակիչների հարցը սեփականատերը պետք է լուծի: Տվյալ շենքի քանդման համար սեփականատիրոջը տրվել է 17 ամիս ժամանակ:

Քաղաքում կանաչ տարածքներն անբավարար են, համապատասխան բաժինն էլ պատճառներից մեկը նշում է ոռոգման ցանցի բացակայությունը: Չե՞ք գտնում, որ քաղաքին անհրաժեշտ է լանդշաֆտային դիզայն և գեղեցիկ կանաչ տարածքներ:

— Քաղաքը ոռոգման ցանց չունի և դա լուրջ խնդիր է: Ոռոգման ցանցի համար մեծ գումարներ են անհրաժեշտ, ինչը քաղաքապետարանն այս պահին չունի, ստիպված այլընտրանքային տարբերակ ենք գտել ու կանաչ հատվածների ոռոգում իրականացնում ենք մեքենաների միջոցով:

Ձեր գնահատականը համատիրությունների աշխատանքին:

— Համատիրությունների հետ մենք համագործակցում ենք, բայց ֆինանսական վերահսկողություն իրականացնելու լծակ չունենք: Նոր օրենք է մտնելու, մենք էլ առաջարկություններ ենք կատարել, որպեսզի ֆինանսական մասով վերահսկողություն կարողանանք իրականացնել:

Քաղաքում, անշուշտ, դեռ բազում խնդիրներ կան, օրինակ՝ կենտրոնական հատվածից դուրս գտնվող թաղամասերի լուսավորության խնդիրը: Այդ թաղամասերում բնակվողները դժգոհում են, որ իրենց մոռացել են: Առկախ է նաև տրանսպորտի հարցը:

— ՎԶԵԲ-ով քաղաքում իրականացվում է լուսավորության ծրագիր, 13.000 լուսակետ ենք ավելացնելու քաղաքում: Գիտենք, որ տրանսպորտի հարցը վատ է, նոր ծրագիր կա, որով 40 ավտոբուս է ներկրվելու Գյումրի, որից  5-ը էլեկտրականությամբ աշխատող:

Սևյանի ակումբի վերականգնման մասով ի՞նչ կասեք:

— Այս հարցը դեռևս քննարկման փուլում է: Կա երկու կազմակերպություն, որոնք ցանկանում են վերակնգնել Սևյանի ակումբը: Տեսնենք, թե ում ծրագիրը կլինի ավելի լավը, և որ ծրագրով այն կվերականգնվի:

Իսկ ինչպիսի՞ն է հարկահավաքության վիճակը:

— Վատ չէ, մոտավորապես 84-85%: Հարկահավաքության մասով աշխուժություն մեզ մոտ նկատվում է նոյեմբեր-դեկտեմբեր ամիսներին: Կարծես թե մեր բնակչության բնավորությունն է  այդպիսին, վճարումները կատարում են տարեվերջին:

Ասում են բան է փոխվել երկրում…  Ըստ Ձեզ, ի՞նչ է փոխվել:

— Այո, ինչ-որ բան փոխվել է: Երիտասարդությունը դուրս եկավ փողոց, պայքարեց ու ապացուցեց, որ ինքն է տերը երկրի:

Վերջերս մի ֆիլմ դիտեցի` «Իրական Կուբա»… մարդիկ աղքատության մեջ էին, սակայն խոսում էին երջանիկ լինելուց: Հայի երջանկության բանաձև կա՞:

— Իհարկե, կա: Ամեն մարդ պետք է իր հերթին իր աշխատանքը կատարի: Կարծում եմ՝ երջանիկ լինելու բանաձևը սա է:

Ս.ՄԵԽԱԿՅԱՆ

print
1,587