Ֆելիքս Ցոլակյան. «Էլ թաղային հեղինակությունները չեն կարողանա դերակատարություն ունենալ»

Գյումրի էր այցելել ՀՀ արտակարգ իրավիճակների նախարարի պաշտոնակատար, գեներալ Ֆելիքս Ցոլակյանը։ Լրագրողներն անհամբեր սպասում էին նրա հետ հանդիպմանը, քանի որ պարոն Ցոլակյանի հետ աշխատանքային պրակտիկա կար ձևավորված, երբ նա Շիրակի մարզպետն էր: Պարոն Ցոլակյանը ողջունելով իր ենթականերին, մոտեցավ իրեն սպասող լրագրողներին: Իսկ հարցերը բազմաբնույթ էին:

— Պարոն Ցոլակյան, ի՞նչ գործընթացում է Գյումրիի երկրորդ հրշեջ ջոկատի ստեղծման հարցը:

— Այդ գործընթացն ընթացքի մեջ է: Այցիս նպատակը՝ ծանոթությունն է: Մի քանի խնդիրներ կան, որոնք պետք է դիտարկվեին: Մենք գարնանը սպասում ենք ճապոնական հրշեջ մեքենաների, որոնք պետք է տեղակայվեն երեք մարզերում: Գյումրիում կան տեխնիկական հարցեր, դրանք կլուծենք, նոր: Երկրորդ խնդիրն էլ կապված է դեկտեմբերի 7-ի հետ. լրանում է երկրաշարժի 30-րդ տարելիցը, համապարփակ միջոցառումների ծրագիր ունենք, կազմակերպչական բնույթի:

— Բայց հրշեջ ջոկատը չունի շենք…

— Մի քանի տեղեր են առաջարկվել, պետք է գնանք, ուսումնասիրենք:

— Պարոն Ցոլակյան, հարմարվե՞լ եք նոր պաշտոնին:

— Հարմարվում եմ, չեմ հարմարվել դեռ:

— Առաջիկա ընտրություններում Ձեզ կտեսնե՞նք «Քաղաքացիական պայմանագիր» կուսակցության ցուցակում:

— Չեմ կարող պատասխանել, այդպիսի խոսակցություն ընդհանրապես չեմ ունեցել, քննարկումների չեմ մասնակցել, ես իմ աշխատանքով եմ զբաղված։

— Վերջերս Ռոբերտ Քոչարյանը հարցազրույցներից մեկում խոսելով իր պաշտոնավարման ընթացքում կոռուպցիա լինել—չլինելու մասին, մասնավորապես, ասել էր. «Կոնկրետ, Ֆելիքս Ցոլակյանը կոռուպցիոն գայթակղությունների տեսանկյունից ամենից ռիսկային պաշտոններում է աշխատել: Եվ պետք է ասեմ, որ նա լավ է աշխատել, ես գոհ եմ եղել։ Եվ հիմա թող հարցնեն Ֆելիքս Ցոլակյանին. այդ  տարիներին ամենից գայթակղիչ պաշտոնները զբաղեցնելով, այդ մարդը որևէ կոռուպցիոն հարաբերություններ իմ կամ վարչապետի հետ ունեցե՞լ է, թե՞ ոչ: Չե՛ն եղել նման հարաբերություններ…», ինչպե՞ս կմեկնաբանեք:

— Ինքը ճիշտ է ասում, ես գործարքների մեջ չեմ եղել։ Գիտեք, հարկային ծառայության պետի գործառույթները շատ պարզ են, այնտեղ հարկերի հետ կապված գործառույթներ են, որոնք ես կատարել եմ բարեխղճորեն, ուրիշ բան չեմ կարող ասել։

— Պարոն Ցոլակյան, ըստ Ձեզ, խորհրդարանը ցրելու անհրաժեշտություն կա՞:

— Այո: Ես գտնում եմ՝ ինչքան շուտ, այնքան լավ: Ես համամիտ չեմ այն կարծիքին, որ դա կարող է շատ մեծ վնասներ բերել իր հետ և այլն… Ոչ մի բան չի փոխվում, ասեմ ձեզ, ովքեր ունեն, այսպես ասած, ռեյտինգ, նրանք հիմա էլ ունեն, մայիսին էլ ունեն, հունիսին էլ ունեն, ոչ մի բան չի փոխվելու մեր կյանքում։ Դրանք պատճառաբանություններ են և դրանց հետ ես համաձայն չեմ:

— Բայց կան անձինք, որոնք ռեյտինգայինի կողմնակից են ու գերակա են համարում, Դուք կողմնակի՞ց եք:

— Գիտեք, շատ զարգացած երկրներ կան, որտեղ կա ռեյտինգայինը, բայց այնտեղ չկան այն բացասական երևույթները, որոնց մասին խոսում ենք։ Այստեղ այդ երևույթների հարցն է, դրանք չպետք է լինեն, բայց մենք ինչքանով ենք համոզված, որ դրանք չեն լինի ռեյտինգայինի դեպքում։ Կա հարգված մարդ՝ այսպիսի հասկացողություն. մեկն ասենք իր շրջանում շատ հարգված մարդ է, դա չի նշանակում, որ այդ հարգված մարդն ինչ-որ գործարքների մեջ պետք է մտնի, կարող է հենց այնպես մասնակցել։ Սա ուրիշ հարց է, բայց, երբ որ դա փոխվում է, ուրիշ բան դառնում, դուք հասկանում եք, ինչի մասին եմ ես խոսում, դա արդեն ընդունելի չէ։ Չեմ կարծում, որ ռեյտինգայինի մնալու դեպքում էլ ռեյտինգայինով ընտրված պատգամավորները կարող են նույն ձևով գործարքների մեջ մտնել և նորից ընտրվել։ Դա ես բացառում եմ, որովհետև մարդիկ այսօր փոխված են, մտածողություն է փոխված, չեն գնալու այդ բանին, ուղղակի չեն գնալու: Էլ թաղային հեղինակությունները չեն կարողանա դերակատարություն ունենալ։ Չեն կարող, ինչ-որ բան կարող է մեկը մի քիչ փախցնի, մի քիչ տանի, այսպիսի բաներ հնարավոր են, բայց ասես՝ կրկնվի այն, ինչ որ եղել է, չի կարող, դա բացառվում է։

— Պատգամավորական մանդատը հանձնելուց ու նոր աշխատանքի անցնելուց հետո Սերժ Սարգսյանի հետ հանդիպե՞լ եք, խոսակցություն եղե՞լ է:

— Ոչ:

— Իսկ ինչպե՞ս են ՀՀԿ—ական գործընկերներն արձագանքել:

— Տարբեր ձևի: Ավելի կոպիտ ասեմ՝ հասկացող մարդիկ ճիշտ են գնահատել, մյուսները ոնց ուզում են, թող մտածեն, իրենց գործն է, արդեն ես ասելիք չունեմ։ Ես գտնում եմ, որ ճիշտ եմ վարվել, սխալ թույլ չեմ տվել և գտնում եմ, որ այն մարդիկ, որոնք հետագայում սկսեցին նույն բանն անել, կարող էին անել ավելի վաղ։

— Դուք Շիրակի մարզպետի պաշտոնում լավ եք տիրապետել մարզի խնդիրներին, նոր իշխանությունների որդեգրած քաղաքականությունն ու ընդհանրապես մոտեցումները բավարա՞ր են: Ի՞նչ խորհուրդ կտայիք:

— Ես կոնկրետ ծրագրերից այսօր չեմ կարող խոսել, որովհետև տեղյակ չեմ շատ բաներից, գիտեմ, որ քաղաքում լայնամասշտաբ շինարարական աշխատանքներ են գնում։ Երբ վարկեր ձևակերպեցին, ես այդ ժամանակ այստեղ էի։ Շիրակի մարզի հետ կապված խնդիրները մի քիչ շատ են, մի խոսքով ասել հնարավոր չէ… Համոզված եմ, որ Ազգային ժողովի ընտրություններից հետո ավելի պարզ կլինի դաշտը և շատ ավելի մեծ հնարավորություններ կստեղծվեն ներդրումների համար։ Եվ այդ ներդրումները, բնական է, միայն Երևանում չեն լինելու, Շիրակն արդեն գայթակղիչ է դարձել, Գյումրին իրենով արդեն գայթակղիչ է… Քաղաքն իր ձևով, իր տեսքով, տուրիզմով, մյուսով, մյուսով… Ես միշտ ասել եմ՝ առաջին օրը, որ ես եկել եմ Գյումրի՝ նախկին աշխատանքին, լրիվ ուրիշ Գյումրի էր, հիմա՝ ուրիշ։ Գիտեք, այսպիսի մի բան կա, երբ ամեն օր տեսնում ես մի բան, սովորում է աչքդ, երբ որ մի քիչ բացակայում ես, նոր ես տեսնում, արդեն աչքիդ երևում է, տեսնում ես, որ նոր բան կա, իսկ Գյումրիում նոր բաներ շատ կան։ Գյումրիին և գյումրեցիներին ցանկանում եմ հաջողություն, որ անպայման Ազգային ժողովի ընտրություններից հետո գնանք այն ճանապարհով, որը գյումրեցիներն ուզում են իրենց քաղաքի համար:

— Պարոն նախարար, ի՞նչը նպաստեց, որպեսզի տեղի ունենա թավշյա հեղափոխություն:

— Հայաստանում հեղափոխական վիճակներ էին. երբ ներքևիններն էլ չեն կարող այսպես ապրել, իսկ վերևինները չեն կարողանում կառավարել: