Հարցազրույց Գյումրու ավագանու ընդդիմադիր «Զարթոնք» խմբակցության ղեկավար ՎԱՐԴԵՎԱՆ ՀԱԿՈԲՅԱՆԻ հետ:
— Պարոն Հակոբյան, Ձեր գնահատականը Ավագանու աշխատանքին: Ձերը տեսել ենք՝ ակտիվ աշխատում եք, բոլոր նիստերին ելույթներ եք ունենում, քննադատություններ եք հնչեցնում, առաջարկություններով եք հանդես գալիս:
— Եթե ամբողջ համայնքի ավագանու գործունեության մասին եք հարցնում, ապա դա համայնքի ժողովրդից պետք է հետաքրքրվել, թե նրանք ինչ կարծիք ունեն իրենց ընտրած ավագանիներից: Իսկ ինչ մնում է ընդհանրական, ապա ինքս համարում եմ, որ ավագանու ինստիտուտը կայացած չէ, դա դեռ պետք է կայացնել: Ինքս ընտրություններին մասնակցել եմ որպես համայնքի ղեկավարի թեկնածու, հիմա մասնակցում եմ զուտ իմ վրա վերցնելով ավագանու ինստիտուտի կայացման պատասխանատվությունը: Ինքներդ էլ շատ լավ գիտեք, որ այն դեռ չի գործում այնպես, ինչպես պետք է: Համայնքի ղեկավարության գործունեությանը պետք է հակակշիռ ուժ լինի, որը լուրջ զարգացման խթան է հանդիսանում: Եվ կայացման գործընթացում ամեն մեկս պետք է ունենանք մեր լուրջ ներդրումը: Դուք էլ եք նկատել, թե նիստերին ով, ինչպես է աշխատում: Սակայն դա բավարար չէ՝ գնահատական տալու համար: Այստեղ աշխատանքը նաև վարագույրների հետևում է, երբ մասնագետներից կազմված թիմ ունես ձևավորած, որոնք որևէ խնդրի, օրենքի, այս կամ այն հարցի շուրջ լուրջ աշխատանքներ են տանում, ուսումնասիրում են, զննում, քննում:
— Խոսեցիք հակակշռությունից… ԱԺ—ի օրինակը վերցնելով, տեսնում ենք, որ փոքր մաս կազմող ընդդիմադիր ուժը եզակի դեպքերում է հաջողության հասնում կամ հակազդում:
— ԱԺ-ի տարբերակով չենք աշխատում, մենք բարձրաձայնում ենք խնդիրները, և մեր քննադատությունները փաստարկված են: Ինչպես նշեցի, մասնագետների՝ իրավաբանների, տնտեսագետների, ֆինանսիստների լուրջ թիմ ունենք, և փաստարկում ենք մեր քննադատությունները: Մենք զուտ քաղաքի շահերից ելնելով ենք աշխատում, եթե նպատակներդ քաղաքի շահերից է բխում, քաղաքացու շահերից է բխում, քո նկրտումները հայրենասիրական է, պետականամետն է, այդ տեսանկյունից արված աշխատանքն էլ իրական է, ոչ թե ընդդիմադիր ձև բռնելու: Ու դրա համար էլ մեզ հետ հաշվի են նստում և բազմաթիվ օրինակներ կան, որ մենք զուտ ճիշտ ենք քննադատել, և մեր կողմից արված առաջարկն է անցել: Այսպես՝ փուլ առ փուլ, քայլ առ քայլ պիտի կայացնենք այս ինստիտուտը: Մենք թիմով ահռելի աշխատանք ենք կատարում, գնում ենք թաղամասեր՝ տեսնելու ինչ վիճակ է, ինչպիսի շինարարություն է ընթանում, ինչ վիճակում է փողոցը, ինչ խնդիրներ են բարձրաձայնում քաղաքացիները… օղակը սեղմելու ենք դրական առումով: Ու այստեղ կապ չունի՝ մեկ հոգի ես ավագանիում, թե չորս հոգի, այլ կարևոր է, թե դու որքանով ես տիրապետում օրենքներին: Նախ՝ դու պետք է հասկանաս, կարողանաս, ուզենաս և իրականացնես: Բարդ է, հավատացեք, այստեղ լիքը խնդիր կա, բոլոր ուղղություններով պիտի կարողանաս հասկանալ, վերլուծել: Ու մի լավ բան էլ կա, որ հույս է ներշնչում. Դուք էլ եք մասնակցել քաղաքային ընտրություններին, լուրջ մարդիկ, մասնագիտական կարողություններով, շեշտում եմ՝ մասնագիտական, ոչ թե հեղինակային, շատ քչերն են այստեղ՝ ավագանիում հայտնվել, շատ քչերն են մասնակցել ավագանուն, որովհետև այնքան է իջեցված եղել ընկալումը, որ թվացել է, թե միայն ձեռք բարձրացնելով է՝ ԱԺ-ի դեպքում՝ կոճակ սեղմելով: Փոխում ենք այդ իրավիճակը. հիշեք, մյուս ընտրություններին հաստատ շատ ավելի մասնագիտացված մարդիկ են մասնակցելու, մենք տանելու ենք դրան, մեր աշխատանքով փորձելու ենք դրան հասնել: Երբ ընտրությունների նախաշեմին է, գնում ենք ընտրողի դուռը, հետո էլ նույն վստահությամբ կարո՞ղ ես գնալ. եթե այո՝ ուրեմն աշխատանք ես արել:
— Իսկ ի՞նչ կասեք, այսպես ասած, «երկգլխան» կառավարման ձևի մասին (նկատի ունեմ, որ երկու՝ «Բալասանյան դաշինք» և «Քաղաքացիական պայմանագիր» կուսակցությունների միջև կնքվել էր հուշագիր առ այն, որ քաղաքի ղեկավարումը ստանձնում են երկուստեք):
— Երկու ուժերի համատեղ կառավարումը արդյունավետ չէ, ավելին՝ սխալ է: Նրանք տարբեր գաղափարներ կրող ուժեր են: Ամեն մեկը պատասխան է տալու իր արածի ու չարածի համար:
— Ավագանիները առանց աշխատավարձ են աշխատում…
— Այո, այդպես է ընդունված: Հավատացեք, բավական ծախսեր կան, որոնք մեր գրպանից ենք անում: Մեր թիմում ֆինանսապես բավարարված մարդիկ են, այստեղ ևս մտածել ենք, որպեսզի այս մարդիկ հնարավոր կոռուպցիոն սխեմաներից զերծ մնան: